اه والله هيا ثواني ولا اكتر , كتير الثواني دي بتعدي علينا واحنا مش واخدين بالنا منها علي انها وقت تافه وغير مهم بالمرة ,سواء كنا بنقضيه في عمل ولا في دراسة , في سعادة ولا في ألم ,المهم انها بتعدي وخلاص, بس الشئ المهم اللي احنا مش واخدين بالنا منه ان الثواني دي هي عصب الوقت ,بمعني الثواني هي الدقيقة , والدقائق هي الساعة ,والساعات هي اليوم, والايام هي الاسبوع,والاسابيع هي الشهر, والشهور هي السنة,والسنين هي العمر, يعني ببساطة الثواني هي العمر.
معادلة سهلة اوي بس للاسف احنا مش واخدين بالنا منها وبنعقدها كتير بدون لازمة, اما الثواني هي العمر, ليه مش عايزين نعيشها ثانية ثانية, ليه بنحاول نقتلها ومانحسش بيها؟, علي كدة الثانية دي ممكن تتملي اي حاجة احنا عايزنها, يعني ممكن نملاها حب وسعادة وفرح وسرور أو نملاها كره وحزن,وغم وكرب, اكيد لو سألنا اي حد عايز يملاها ايه,ماظنش انه هايختار انه يملاها اي حاجة غير السعادة والحب والسرور, وإلا مش هايكون انسان طبيعي لو عايز ينكد علي نفسه وعلي اللي حواليه.
ده مايمنعش برضه ان الثانية دي تلبس قناع في بعض الاوقات , يعني تلبس قناع الحزن لو حاجة وحشة حصلت ,او لو حد ضايقنا حبتين بكلمة ولا كلمتين ,وعكنن علينا شوية , ولا حبيبة قلب هجرت حبيبها,والعكس صحيح, المشكلة بقي ان احنا بنفضل لابدين في الثواني الوحشة الاليمة دي ونفضل نهدر دقائق وساعات وشهور وساعات سنين كمان علي حس الموضوع ده ,ومانخدش بالنا من الوقت اللي عمال يجري وما بيوقفش ابدا,لانه مش ساعة هاتدوس عليها ستوب هايقف يستناك,لا ده قطار وانت راكب فيه لغاية لما محطتك تيجي وبعدين تتوكل علي الله, المهم بقي ياباشا ,انت قضيتها في القطر ده ازاي, قعدت تضحك مع واحد ظريف ,ولا ترغي مع واحد جدع,ولا تعاكس في بت أمورة, ولا قعدت تتخانق مع البياعين المتجولين,ولا ريحت دماغك وسلمتها وشخرت, ولا قعدت تراجع حساباتك واستغليت وقتك صح؟
خلي بالك يا بوب وخلي بالك يا برنسيسة,ان الدقائق اللي بتقرأ او بتقري فيها المقال ده برضه محسوبة من عمرك, يعني بالبلدي كدة حياتنا مجرد ثواني لاننا بنعيش الثاية لكن مش بنعيش السنة,أقصد انك ممنن تفرح في ثانية ,وتحزن في ثانية ,وتحب في ثانية,وتاكل في ثواني ,طبعا في فرق بين شخص واخر في العملية دي بالذات,لكن مش بتاكل في سنة ,وبتحب في سنة وبتشرب في سنة,قدرت اوصل المفهوم؟
يبقي ليه بقي ننكد علي نفسنا أكتر من اللازم ونفكر اوي في الجاي لدرجة اننا ننسي دلوقتي, وندي شوية حاجات اكتر من وقتها؟
عايزين نعيش اللحظة والثانية في وقتها, اه نذاكر ونشتغل ونبقي جد ونهرج شوية ونزعل حبة ونفرح
حبتين ,بس المهم ان احنا مانضيعش عمرنا في اي حاجة وحشة وماترضسش ربنا,وطبعا مانضيعهاش في بكاء علي اللبن المدلوق ولا علي حد سابنا او ماهمهوش زعلنا, ولا ايه رأيكم؟؟؟؟
مش هي مجرد ثواني برضه؟؟؟؟؟؟؟؟
ليست هناك تعليقات:
إرسال تعليق