********************
يعني ايه كوكاكولا زيرو: يعني مبارك يكون ماسك البلد 30 سنة ويكون خاربها، ولما نقوله كفاية كدة ياريس يقولك هاصلحهاكم في ست شهور فقط
*********************
يعني ايه كوكاكولا زيرو: يعني بعد كل المسخرة اللي الشباب سجلوها على اليوتيوب والفيس حول توزيع كنتاكي على المتظاهرين في التحرير، تلاقي حد بيدعي انه مثقف
يكون لسة مصدق الموضوع ده، لأ وايه تتبارى ثقافته إنه بيقولك لأ ماهو مش لازم يكون كنتاكي، ماهو فيه مؤمن وماكدونالد وغيره، طبعا الثقافة متجلية في إنه يعرف أسماء المطاعم دي
*********************
يعني ايه كوكاكولا زيرو: يعني قبل يوم 25 يناير كان أصحابي بيخافوا عليا من الكلام اللي بكتبه ضد مبارك وحاشيته، لكن بعد 25 يناير الشعب كله تنفس الحرية بدماء الشهداء اللي دفعوا ثمن كتابة ستاتس ضد الظلم بدون خوف
**********************
يعني ايه كوكاكولا زيرو: يعني ندرس مسرحية تاجر البندقية لشكسبير ونشوف إزاي شكسبير قدر يخلي جمهوره يتعاطف مع شايلوك في النهاية، ويطلع الرئيس مبارك هو الوحيد اللي عرف يطبق النظرية وخلى نصف الشعب يتعاطف معاه بعد أن كانت رقبته على حافة منصة الإعدام
***********************
يعني ايه كوكاكولا زيروا: يعني لما الوكالات الأجنبية تتسابق وتجاهد لنقل صورة الشعب المصري في ميدان التحرير ،تجد التلفزيون المصري والذي يبعد بضعة أمتار عن ميدان التحرير يكتفي بإخراج كاميرا من نافذة المبنى تنقل صورا لشارع ماسبيرو الهادئ وموج النيل النائم ودبابتين يتسامران بأسفله
***********************
يعني ايه كوكاكولا زيرو: يعني نكون قاعدين في ميدان التحرير بالملايين بنتفرج على القناة الأولى المصرية والتي تحمل خبرا يقول " ميدان التحرير خال من المتظاهرين الآن تماما" أكيد كان قصدهم محل كشري التحرير خال من الرواد تماما
***********************
يعني ايه كوكاكولا زيروا: يعني تكون فيه ثورة مصرية يوم 25 يناير سيسجلها التاريخ بين أعظم الثورات في العالم ويقوم التلفزيون المصري في نفس اليوم بتجاهل الثورة ويغطي اتصالا هاتفيا للرئيس مبارك لبحث آخر الأوضاع في لبنان
***********************
يعني ايه كوكاكولا زيرو: يعني تبقى اسمها ثورة تغيير وتلاقي ناس لسة بتعمل قص ولزق من غير حتى ماتفكر في اللي بتقوله
***********************
يعني ايه كوكاكولا زيروا: يعني يقولك الإخوان المسلمين هما اللي عاملين الثورة في ميدان التحرير والنهاردة بعد الظهر تلاقي قداس إخواتنا المسيحيين بيتعمل في التحرير
***********************
يعني ايه كوكاكولا زيرو: يعني لما كنت معتصم في التحرير كنت بنام ساعة أو اتنين كل يومين ولما جيت البيت نمت عشرين ساعة في أربعة وعشرين ساعة، يعني لما كنت في التحرير كنت باكل ساندوتش جبنة في اليوم وبكون شبعان جدا ودلوقتي قاعد في البيت وباكل طول اليوم وجعان جدا، يعني لما كنت في التحرير كنت بنضف الميدان وبكنسه كل ساعة ولما رجعت البيت مش قادر أطبق حتى البطانية اللي بستغطى بيها
***********************
يعني ايه كوكاكولا زيرو: يعني الشباب في التحرير يموتوا من الجوع والشباب على السرير يقولوا دول بياكلوا كنتاكي، يبقى الشباب بيقوم بثورة إصلاح عشان الشعب كله يعيش بشرف وتلاقي ناس جاهلة تقول عليهم دول شباب فاضية وماورهاش حاجة، تبقى الثورة بيشارك فيه الدكتور والمهندس والكناس والشيخ والمسيحي والغني والفقير والفنان والعاطل ومدير البنك والمحجبة والمتبرجة ويقولك دي ثورة إخوان مسلمين
***********************
يعنى ايه كوكاكولا زيرو ... يعنى مصر تعمل مظاهرات والجزاير هيا اللي تلغي قانون الطوارئ يعني الظباط والعساكر تاخد اجازه نص السنه والشباب هو اللي ينزل يحرس طول الليل يعني نعمل الثوره والمساجين هما الي يتحروروا !!
***********************
يعنى ايه كوكاكولا زيرو ؟؟ ... يعنى تبقى واقف فى اللجنه الشعبيه بتحشش و يجى البوكس تقوم مفتشه
ليست هناك تعليقات:
إرسال تعليق